Undir sömu stjörnu

Óperan, sem stofnuð var með lögum árið 2025 sem hluti af Þjóðleikhúsinu, hefur starfsemi sína með söngdagskrá sem fer um landið áður en hún kemur til Reykjavíkur. Titillinn vísar til þess að sama ár og Jónas Hallgrímsson orti Ástarstjörnu yfir Hraundranga samdi Richard Wagner aríu til kvöldstjörnunnar. Saga óperunnar er rakin frá ítölskum hirðum til Íslands. Fjórir nýráðnir söngvarar Óperunnar syngja, Kristín Einarsdóttir Mäntylä, Hildigunnur Einarsdóttir, Gunnar Björn Jónsson og Kristján Jóhannesson, og leikararnir Ólafía Hrönn Jónsdóttir og Örn Árnason leiða áhorfendur í gegnum söguna. Ólafur Egill Egilsson skrifaði handritið og leikstýrir, og dagskráin tekur um tvær klukkustundir með einu hléi. Á Eskifirði, í samstarfi við Menningarstofu Fjarðabyggðar, koma fram Sinfóníuhljómsveit Austurlands, Óperukór Austurlands og Kammerkór Norðurlands undir stjórn Richards Schwennicke, og gestasöngvari er Hlín Pétursdóttir Behrens.