Fjórir söngvarar syngja lög Gylfa Þ. Gíslasonar

Fjórir söngvarar og píanóleikari flytja úrval laga af Þjóðvísu, tveimur nýjum diskum sem geyma nær öll sönglög Gylfa Þ. Gíslasonar: tuttugu lög sem margir þekkja og ellefu sem hafa aldrei heyrst áður. Gylfi, sem fæddist 1917 og lést 2004, var menntamálaráðherra frá 1956 til 1971 og prófessor við viðskiptadeild Háskóla Íslands og samdi einnig sönglög. Andri Björn Róbertsson bassabarítón, Dísella Lárusdóttir sópran, Elmar Gilbertsson tenór og Hildigunnur Einarsdóttir messósópran syngja og Helga Bryndís Magnúsdóttir leikur á píanó. Þorvaldur Gylfason, sonur tónskáldsins, segir stuttlega frá lögunum.