Falstaff

Falstaff er síðasta ópera Verdis, frumsýnd í La Scala í Mílanó árið 1893, og hefur aldrei áður verið sett á svið hér á landi. Hún er jafnframt fyrsta stóra uppfærsla Óperunnar, sem stofnuð var með lögum árið 2025 sem hluti af Þjóðleikhúsinu. Arrigo Boito sótti Falstaff í gamanleik Shakespeares, Vindsórkonurnar kátu, og fléttaði inn línum úr Hinriki IV. Í óperunni sendir aldraður og auralaus riddari tveimur giftum konum sama ástarbréfið, með augastað á fé eiginmanna þeirra. Konurnar bera saman bréfin og leika á hann: honum er sturtað í Thames ofan í þvottakörfu og um miðnætti ráðast að honum bæjarbúar í gervi álfa. Að lokum syngur allur hópurinn fúgu um að allt í heiminum sé grín. Sungið er á íslensku í nýrri þýðingu Sólveigar Sigurðardóttur og Þórhalls Auðs Helgasonar. Ólafur Kjartan Sigurðarson, sem hefur sungið Niflungahringinn í Bayreuth, fer með titilhlutverkið, einn af tíu einsöngvurum, og með þeim eru kór og fullskipuð hljómsveit undir stjórn Alexanders Joel. Brynhildur Guðjónsdóttir leikstýrir. Uppfærslan er sú fyrsta sem Óperan vinnur í samstarfi við Sinfóníuhljómsveit Íslands.