Seltjarnarneskirkja

Seltjarnarneskirkja stendur á Valhúsahæð. Feðgarnir Hörður Björnsson byggingatæknifræðingur og Hörður Harðarson arkitekt urðu hlutskarpastir í samkeppni um kirkjuna, Sigurður Kr. Árnason var byggingameistari og hún var vígð 19. febrúar 1989. Neðri hæðin hafði þá þegar verið í notkun um skeið. Björgvin Tómasson smíðaði orgelið, sem er sautján radda og var vígt 21. mars 1999. Glerverk Ingunnar Benediktsdóttur eru í anddyrinu og verk Herdísar Tómasdóttur, Frá myrkri til ljóss, kom í kirkjuna árið 1990 og hangir hægra megin við prédikunarstólinn. Þrjár klukkur eru í klukkuturni framan við kirkjuna.