Dómkirkjan í Reykjavík

Dómkirkjan var vígð árið 1796 og var fyrsta húsið sem reist var í Reykjavík af því að þar skyldi verða höfuðstaður landsins. A. Kirkerup teiknaði hana. Byggingin stóðst illa tímans tönn og var endurbyggð árið 1848 að forsögn L. A. Winstrup, sem hækkaði hana og bætti við kór, forkirkju og turni. Tæpri öld eftir vígsluna reis Alþingishúsið fast við kirkjuna, og þingmenn ganga þangað enn til messu við þingsetningu. Karl Schuke í Berlín smíðaði orgelið og það var vígt 1. desember 1985, 31 rödd á þremur hljómborðum. Fyrsta orgel kirkjunnar kom árið 1840 og var hið fyrsta sem kom í íslenska kirkju.