Skálholtsdómkirkja

Skálholtsdómkirkja var vígð árið 1963 og er tíunda kirkjan sem stendur á staðnum. Sú fyrsta reis skömmu eftir að Íslendingar tóku kristni um árið 1000. Áður en núverandi kirkja var reist fór fram fornleifauppgröftur undir stjórn Kristjáns Eldjárns, síðar forseta Íslands, og þar fannst steinkista Páls biskups Jónssonar, sem jarðsettur var árið 1211. Hörður Bjarnason húsameistari ríkisins teiknaði hana krosslagða, með þverskipi og hliðarskipum, og hafði kirkju Brynjólfs biskups Sveinssonar frá 1650 að fyrirmynd. Altari hennar, stjakar og prédikunarstóll standa enn í kirkjunni. Steindir gluggar Gerðar Helgadóttur vísa til sögu biskupsstólsins og píslarsögunnar, og mósaíkaltaristafla Nínu Tryggvadóttur var sett upp árið 1966. Orgelið er smíðað af Frobeníusi. Sumartónleikar hafa verið haldnir í kirkjunni á hverju sumri frá 1975.