Keflavíkurkirkja

Keflavíkurkirkja var teiknuð af Rögnvaldi Ólafssyni og vígð 14. febrúar 1915; yfirsmiður var Guðni Guðmundsson múrari. Hún leysti af hólmi timburkirkju sem skemmdist í óveðri árið 1902, áður en smíði hennar lauk, og altarið og prédikunarstóllinn voru smíðuð fyrir þá kirkju. Kirkjan er steinsteypt og friðlýst. Hún horfir mót hafi. Altarið er við vesturstafninn, öfugt við það sem venja er í íslenskum kirkjum. Árin 1966 og 1967 var reistur kór við kirkjuna og kirkjuskipinu breytt eftir teikningum Ragnars Emilssonar. Á árunum 2012 til 2020 færði Páll V. Bjarnason arkitekt kirkjuskipið aftur nær upprunalegri mynd, og prédikunarstóllinn og gráturnar, sem höfðu verið fjarlægð við fyrri breytingarnar, komu aftur á sinn stað. Altaristafla Ásgríms Jónssonar frá 1916 sýnir fjallræðuna í íslensku landslagi. Marteinn Guðmundsson myndskeri frá Merkinesi í Höfnum skar skírnarfontinn úr eik árið 1945. Björgvin Tómasson smíðaði orgelið, sem er tuttugu og fimm radda og var tekið í notkun árið 2020.