Fella- og Hólakirkja

Fella- og Hólakirkja var teiknuð af Ingimundi Sveinssyni og Gylfa Guðjónssyni, byggð af Haraldi Sumarliðasyni og vígð á pálmasunnudag 1988. Húsið er jarðvegsfyllt og um það liggur gluggaband hringinn í kring; í rökkri virðist efri hlutinn fljóta yfir jörðinni. Steindu gluggarnir eru eftir Leif Breiðfjörð og bera tákn og orð úr Ritningunni, og altaristaflan er úr steindu gleri og hangir skáhallt yfir altarinu. Í miðri kirkjunni hangir glerverk eftir hann með sjö dúfum. Altarið og prédikunarstóllinn eru úr blágrýti og skírnarfonturinn úr marmara. Orgelið kom frá Marcussen & Søn í Danmörku, er tuttugu og þriggja radda og var vígt 31. maí 1992; orgelhúsið er úr furu.