Sakari stjórnar blásarasveitinni

Blásarasveit Sinfóníuhljómsveitar Íslands leikur í Norðurljósum undir stjórn Petris Sakari, fyrrum aðalstjórnanda hljómsveitarinnar. Tónleikarnir hefjast á lúðragjalli Pauls Dukas úr balletttónlistinni við La Péri. Þá koma Dixtour eftir Darius Milhaud og Sinfóníur fyrir blásara eftir Stravinskíj, verk sem tileinkað er minningu Claudes Debussy og endar á kyrrlátum kóral. Ruth Gipps var enskt tónskáld og óbóleikari, og Seascapes hennar er skrifað fyrir tíu blásara. Tónleikunum lýkur á Gran Duo eftir Magnus Lindberg, þar sem tré- og málmblásarar takast á, tuttugu og fjórir talsins. Tónleikarnir taka um klukkustund án hlés.