Bertrand Chamayou

Bertrand Chamayou leikur einn á píanó daginn eftir að hann kemur fram með hljómsveitinni. Leiðarstefið er sönglagið án orða. Smálög Mendelssohns bera það heiti sjálf. Umhverfis þau raðast tónlist sem sprottin er af söng: Song without (good) words eftir Charles Ives, Widmung Schumanns í umritun Liszts, útsetning Takemitsus á Golden Slumbers eftir Bítlana og upprifjun Kurtágs á rúmenskum jólasöng. Eine kleine Mitternachtmusik eftir George Crumb er byggð á 'Round Midnight eftir Thelonious Monk. Tónleikunum lýkur á Wanderer-fantasíu Schuberts, en hver þáttur hennar hefst á tilbrigði við samnefnt sönglag tónskáldsins. Um klukkustund án hlés.