Oddur Arnþór Jónsson

Barítón sem lærði hjá Ólöfu Kolbrúnu Harðardóttur og Alexander Ashworth í Söngskólanum í Reykjavík og lauk framhaldsnámi í óperu- og ljóðasöng við Mozarteum-háskólann í Salzburg, þar sem hann hlaut Lilli Lehmann-viðurkenninguna. Hann var útnefndur Bjartasta vonin á Íslensku tónlistarverðlaununum 2014 fyrir Rodrigo í Don Carlo, frumraun sína hjá Íslensku óperunni, og hlaut verðlaunin sem söngvari ársins 2018 fyrir Michael í Brothers eftir Daníel Bjarnason. Hjá Íslensku óperunni hefur hann einnig sungið titilhlutverkin í Don Giovanni og Rakaranum í Sevilla, greifann í Brúðkaupi Fígarós og Ned Keene í Peter Grimes. Annars staðar hefur hann sungið Wolfram í Tannhäuser, Kurwenal í Tristan og Ísold og Schaunard í La bohème. Á síðasta ári söng hann Carmina Burana með Sinfóníuhljómsveit Íslands, Sálumessu Mozarts með Mótettukórnum, Lieder eines fahrenden Gesellen eftir Mahler í Fílharmóníunni í Berlín og Silvio í I Pagliacci í Ulm.